Муус устар 12 күнэ- "JUNIOR SKILLS күрэх элэмиэннээх ОҔО САТАБЫЛЫГАР чемпионат"
Ытык-Күөллээҕи Оҕо Спуордун дьиэтигэр Муус устар 12 күнүгэр JUNIOR SKILLS күрэх элэмиэннээх ОҔО САТАБЫЛЫГАР чемпионат буолла. Киирэр аантан саҕалаан тэрээһин олус бэлэмнээҕин көрдөрдө. Хас биирдии кытааччыга кьюар кодтаах , опростаах хаарта биэрдилэр. Кэлбит күрэхтэһээччилэри уонна ыалдьыттары арыылаах алаадьынан күндүлээтилэр. Тэрээһини арыйда кэрэ ырыанан Алина Еремеева. Кэлбит ыалдьыттар тыл эттилэр, ол курдук Таатта улууһун аҕа баһылыга Михаил Михайлович Соров урукку умнулла илик сатабыллары сайыннарыы инники олохпут сайдыытын кэскилэ буоларын санатта. Биллиилээх учуонай, общественнай деятель Винокурова Ульяна Алексеевна олус үөрэн , долгуйан туран оҕолорго эҕэрдэтин тириэртэ.
Сахалыы тыыннаах хаһыат компетенцията үлэтин саҕалаабытынан барда, камералаах оҕолор хаамыстылар, интервью ылан бардылар. Саха көрдөрөр иһитиннэрэн хампаанньа кэлбит, дьонтон кэккэ ыйытыктарын ыйытта, уһулла, хаартыскаҕа түһэрдэ.
Чемпионат сэттэ көрүҥүнэн барда: "Память семейных ценностей"- Сатабыл ситимэ, "Анимация ,дизайн персонажей" ( мультик оҥоруу),"Туризм" (Туристичэскэй маршрут бырайыагын оҥоруу),"От үлэтин тэриллэрэ" (от мунньар кыраабыл), "Дьиэ тэрилин оҥоруу "(талахтан олоппос оҥоруу), "Ийэ тыл сурук-бичик "(Сахалыы тыыннаах хаһыаты таһаарыы)," Дизайн одежды" (Ийэ сылыгар аналлаах таҥаска уруһуй) .
Чөркөөх орто оскуолатын 7-ис кылааһын үөрэнээччитэ Борисов Айтал от үлэтин тэриллэрэ компетенцияҕа учууталын кытта кэлбит. Хатыҥ маһы табыгастаахтык туттан кыраабыл тиистэрин кэчигирэппит.
Егоров Данил Баайаҕа орто оскуолатын 9-ус кылааһын үөрэнээччитэ . Былыргы туттар малы-салы билиҥҥи олоххо туһаныы ,билии, историяны билэргэ, тутан-хабан көрөргө олус наадалаах диэн сэргээтэ. Күрэх кыттыылаахтарыгар ситиһиини баҕарда.
Унаров Артем Чычымах орто оскуолатын 7-ис кылааһын үөрэнээччитэ. Эһээтинээн Николай Семенови Васильевтыын кэлэн көхтеехтүк кытыннылар.Талах олоппос оҥоруу технологията олус эриэккэс уонна дьикти буоларын кэпсээтэ. Маннык олоппос атын дойдуларга манна курдук сайдыбатаҕын сырдатта. Билигин урукку дьиэ мала-сала аныгылыы хараҕынан олус эриэккэс буоларын бигэргэттэ.
Дизайн одежды көрүҥүгэр 8 оскуолаттан 18 кыттааччы кытынна. Манна биир үксүн кыргыттар эдьиийдэринээн, ийэлэринээн, учууталларынаан бааллар. Ийэ сылыгар аналлаах гобелен оҥоруутугар сорудах тутуан үлэлээтилэр. Ытык -Күөл 1-гы оскуолатын үөрэнээччитэ Максимова Айыына олус кичэллэн оҕуруо тиһэригэр түбэһэ түстүм: -Дорообо, Айыына. Бу ийэ уобараһын биэрэргэр мин көрдөхпүнэ олус элбэх дьүһүнү туттубуккун,ону миэхэ кылгастык быһаар эрэ.
-Дорообо, бу ийэ уобараһыгар мин элбэх дьүһүннээх баттахтаатым. Омос көрдөххө киһи хараҕар быраҕыллар, ол гынан баран ити ис хоһооно, үтүө санаата, оҕоҕо таптала көстөр. Бу курдук хас биирдии кыттааччы оҥоһуктарын ис сүрэхтэн кичэллэн оҥоро олороллор. Дьохсоҕон орто оскуолатыттан 5-ис кылаас үөрэнээччитэ Айыллаана Попова кытынна. Кини оҥоһуга атыттартан уратыта диэн тыыннах матырыйаал. Хатын мас туоһун табыгастаахтык туттан кырачаан тууйас оҥорон таһаарбыт.
Туризм диэн компетенцияҕа 16 киһи 6 хамаанда буолан кытыннылар. Хас биирдии хамаанда бэйэтин олорор сирин кэрэ бэлиэ сирдэринэн маршрут программатын айан таһаардылар.
Бу курдук талааны арыйар, уруккуну , билиҥҥини ситимниир тарбах талаанын арыйар күрэхтэр биһи улууспутугар элбии турдуннар.
Нарыйаана Старостина
Чычымах орто оскуолатын 5 кылааһын үөрэнээччитэ
